Hargeysa(CNN)-Xaflad furitaan u ah Sanad Dugsiyeedka 2012-2013 ee Dugsiyada kala duwan ee NURADIN iyo Gudoonsiinta jaa’isadaha Ardayda Kaalmaha sare ka galay fasalada iyo Akhlaaq wanaaga ayaa maanta lagu qabtay Hotel Maansoor ee magaalada Hargeysa.

Munaasibadaasi furitaanka u ah Dugsiyada NURADIN waxaa ka soo qayb galaymaamulka iyo macalimiinta NURADIN, Culima Awdiin, masuuliyiin xukumada ka tirsan,Waalidiin, Ardayda Dhigata Dugsiyada kala duwan ee NURADIN oo ku labisan Dirayska dugsiyada sare, Hoose dhexe iyo kuwa kale.

Waxa ugu horayn ka hadlay xafladaasi Maamulaha Guud ee Dugsiyada NURADIN Mahad Ibraahim Maxamed oo ku Hadlayay Afka maamulada kala duwan iyo macalimiinta Dugsiyada Nuuradiin, waxaanu ka warbixiyay munaasibadan furitaanka u ah Dugsiyada NURADIN oo uu sheegay in lagu dhiirigalinayo Ardayda laguna Ambaalmarinayo 374 Arday oo kaalmaha hore iyo Akhlaaq wanaaga ka galay fasalada ay dhigtaan,Ardaydan oo laga sookala oo isugu jira 89 fasal kuwaasi oo ka kooban Wiilal iyo Hablo.waxa kale oo uu sheegay in Ardayda kaalmaha hore ka gashay Dugsiyada NURADIN ay qaarkood heleen waxbarasho dibada ah, kuwaasi oo uu ka mid yahay Yaxye Rashiid Cumar oo jaamacad Urdun ku taala ka helay deeq waxbarasho oo kharashka ku baxaya oo dhan $30,000 oo Dollar uu bixinayo baanka Islaamku.

Waxa uu tilmaamay maamulaha dugsiyada NURADIN macalimiinta iyo maamulka NURADIN in aanay fasax ahayn mudadii saddexda bilood ahayd ee Ardaydu fasaxa ku muqnaayeen balse ay ku hawlanaayeen sidii loo horumarin lahaa Hanaanka wax-barasho ee dugsiyada NURADIN iyo sidii kor loogu qaadi lahaa tayada Ardayda oo markii horeba fiicnayd.

Waxa uu Mahad Ibraahim Maxamed sheegay inay soo saareen warqad ka war-bixinaysa Ardayda, warqadaassi oo ay ku qoran yihiin heerkiisa wax barasho, sida uu uga qayb qaato hawlaha wax barasho ee Dugsiga sida laylisyada uu uga soo shaqeeyo, inuu hambsaamo iyo inkale. Warqadan ayuu Maamuluhu tilmaamay in ujeedadeedu tahay sidii waalid ku u la socon lahaa Ardaygiisa iyo heerka uu marayo.Isagoo ka hadlayana waxa uu yidhi.

“warqadan waxaa ku qoran warbixinta Ardayga, waxa ku qoran ilmahaagu miyuu soo daahaa ma jaraa iskuulka, waxa ku qoran ilmahaaga Akhlaaqdiisu waa side, waxaa kale oo ku qoran Ardaygaagu ma yahay mid ka qayb qaata hawlaha dugsiga hadii laylis loo diro ma ka qayb qaataa haduu doono yuu garane. Waxaa warqadan nagaga baxay tacab badan oo intii Ardaydu fasaxa ku maqnayd Macalimiinta iyo Maamulka midna fasax muu galin totali.”

Waxa kale oo maamulaha Dugsiyada Nuradin u soo jeediyay waalidiinta inay ka war hayaan Ardayda islamarkaana ay ogaadaan heerka waxbarasho ee Ilmaha ay u dirayaan iskuulka, waxaanu Amaan u soo jeediyay Hooyooyinka Caruurtoodu dhigtaan Dugsiyada NURADIN oo uu sheegay inaanay la aantood hawlaha waxbarasho u suurta gasheen isla markaana si joogta ah uga war hayaan Ubadkooda oo ay maamulka iyo macalimiintaba xidhiidh la leeyihiin, iyagoo si toos ah u yimaada xiliga Dugsiga looga baahdo.

Waxa uu sidoo kale maamulaha Dugsiyada NURADIN u soo jeediyay Aabayaasha inay ku dadaalaan sidii ay u la socon lahaayeen waxqabadka Ubadkooda si ay mustaq bal wanaagsan ugu horseedaan, waxaanu tusaale u soo qaatay Tix Gabay ah oo uu tiriyay Maxamed Cabdiraxmaan Lugooyo, waxaanu yidhi:

“ maanta Aabayaasha waxaan odhanayaa hal Eray oo uu yidhi Maxamed Cabdiraxmaan Lugooyo oo ahaa Qawlkii ragii hore hadaan eray ka soo qaato waxuu qaylka yari raacayaa Qoobkii faraskiiye nin waliba Qorshihii Aabihii wuu qalidayaaye hadii Odaygu Qaadka u mir kaco Ubadku qayraanye”.

Waxa kale oo uu maamuluhu waalidiinta u soo jeediyay inay .bixiyaan Bisha laga qaado Ardayda oo uu tilmaamay inay mararka qaarkood ay waalidka ay isku fahmi waayaan. Waxaana hadaladiisii ka mid ahaa

“waxa dhacda inay waalid ku yidhaahdaan Ilmahaygu fasax ayuu ahaa ee maxaan lacagta ku bixiyaa waxaa weeye macalinku waxa uu ku hawlanaa sixida imtixaanada markaa waa qof idinkoo kale ah xaas iyo caruurna leh, waxa aanu haynaa waxii idiinku qaalisanaa oo ah caruur, ma jiraan waxIlma caruura gooya oo aduunka yaala. Waynu isla ognahay inaanay dahab iyo Doolar toona gooyn ubadkeena. Waxaan runtee leeyahay aynu u wada socono maamul, macalimiin iyo waalid ahaan.”

Waxaa isna madashaasi ka hadlay Agaasimaha Guud ee wasaarada Wax-barashada Somaliland waxaanu sheegay Dugsiga NURADIN kaalin muhiim ah kaga jiro waxbarashada dalka, islamarkaana ay muhiim tahay in wax-barashadu yeelato dhinacyo kala duwan sida qaar Carabi ku baxa iyo Ingiriis oo uu tilmaamay inay dunidu ku horumartay waxbarashada kala duwan. Waxa uu Ardayda u soo jeeduyay inay wax-barashada ku dadaalaan isagoo tilmaamay inay Ardaydan ka soo baxayaan Madaxdii iyo Aqoonyahaynkiibarito. Waxa uu agaasimuhu timaamay inay wasaarada waxbarashadu diyaar u tahay inay taageerto dugsiyada gaarka ah.

Amaal Xaaji Miisaan oo ah la taliyaha dhinaca siyaasada Haweenka ee madax-waynaha ayaa hadal kooban oo ay ka soo jeedisay munaasibadaasi aya ku Amaantay Ardayda madashaasi fadhiday sida ay u labisan yihiin gaar ahaana Hablaha oo ay ku amaanta sida ay u xijaaban yihiin. Waxay tilmaantay inay wakhtiyaday wax baranaysay Shaadh iyo Suwaal xidhan jireen hablahu balse maanta nasiib wanaag si xora Habluhu ugu labisanayaan Anshaxa wanaagsan iyo sida Diinteena Suubani ina farayso.

Gabagabadii munaasibadaasi ayaa Maamulaha Guud ee Dugsiyada NURADIN Mahad Ibraahim Maxamed uu Jaa'isado ku Gudoonsiiyay Ardaydii ku guulaysatay kaalmaha hore iyo Akhlaaq wanaaga ee sanad dugsiyeedka 2012, waxa kale oo Shahaado sharafyo lagu doonsiiyay Waalidiintii ugu firfircoonaa ee sida joogtada ah u la shaqayn jiray maamulka iyo macalimiinta islamarkaana ka war hayn jiray Ardaydooda.

Mawliid Cali Aadan

Caynaba news-office

Hargeysa-somaliland

Mawliid2011@hotmail.com