UGANDA(CNN) Madaxweynaha Uganda Yoweri Kaguta Museveni oo ciidamada ugu badan Soomaaliya ka joogaan dalkiisa ayaa taageeray madaxweynaha cusub ee Soomaaliya Xasan Sheekh Max’ud

Yoweri Kaguta Museveni ayaa fariin hambalyo ah madaxweynaha cusub usoo mariyey safaaradda Soomaaliya ku leedahay magaalada Kampala ee caasimadda dalka Uganda.

Fariintan ayaa waxaa shalay safaaradda Soomaaliya ee Kampala gaarsiiyey wasiirka arrimaha debadda Uganad isagoo wakiil ka ahaa madaxweynaha dalkaa Yoweri Museveni.

“Aniga oo wakiil ka ah shacabka iyo dowladda Ugada waxaan si diiran kuugu hambalyeynayaa doorashada laguu doortay madaxweynaha Jamhuuriyadda Federaalka ee Soomaaliya” ayaa lagu yiri warqadda Yoweri Museveni usoo diray safaaradda Soomaaliya ee Uganda.

Yoweri Museveni ayaa xusay in doorashada madaxweyne Xasan Sheekh Max’ud iyo gudoomiyaha baarlamanka Max’ed Sheekh Cusmaan Jawaari ay tusaale muhiim ah u yihiin sii xajinta guulihii horay loo gaaray iyo nabad iyo deganaasho ka dhaca Soomaaliya.

Wuxuu Yoweri Museveni amaanay baarlamaanka Soomaaliya oo uu sheegay inuu qabtay doorasho xor ah oo cadaalad ah.

Ugu dambeyntii, Yoweri Museveni ayaa amaan u jeediyey odayaasha dhaqanka ee soo xulay baarlamaanka Soomaaliya, guddigii farsamada soo xulista baarlamaanka iyo gudoomiyihii KMG ahaa ee baarlamanka Jen. Muuse Xasan Abdulle oo wax weday doorashdii madaxweynaha iyo gudoomiyaha baarlamaanka Soomaaliya.

Dalka Uganda ayaa ah dalka ciidamada ugu badan ee ka socda Midowga Afrika ee AMISOM ka yimaadeen, waxaana Yoweri Museveni loo arkaa madaxda Afrika ee saameynta ku leh xilligaan arrimaha dalka Soomaaliya.

Mursal Caydiid

Caynabanews Office Kismayo