Mahad Bile Cali Musharaxa Golaha Deegaanka Degmada Berbera, Gobolka Saaxil Urur Siyaasadeedka RAYS

Musharixiinta urur siyaasadeedka RAYS uga qaybgalaya doorashada
golayaasha deegaanka ayaa xafladaha shaacinta ah iyo soo dhawaynta ah
ee loo samaynayo musharixiinta ay ku soo badanayeen saaxadda
saxaafadda iyo guud ahaan warbaahinta gobollada dalka kuwaasoo u badan
xubno dhalinyar iyo aqoonyahanno ku cusub saaxadda siyaasadda balse
cod iyo taageeraba ka kasban karaya bulshada.
Mudane Mahad Bile Cali oo ka mid ah Musharixiinta urur siyaasadeedka
RAYS uga qaybgalaya doorashada golaha deegaanka degmada Berbera,
gobolka Saaxil ayaa uga waramay qaar ka mid ah warbaahinta hudheelka
Safaari ee magaalada Hargeysa. Musharaxa Mahad Bile Cali oo aannu ugu
horayn waydiinnay sida ay u timiday fikradda musharaxnimadiisu ayaa ku
jawaabay “Waa su’aal wanaagsan, sida runta ah markii aan galay
marxaladdan doorashooyinka golayaasha deegaanka, waxa iga codsatay oo
ii soo jeediyay inaan ka qaybgalo dadweyne tiro badan oo asxaabtayda
sharafta leh, aqribaaga iyo akhyaartayda oo in badan oo ka mid ahi
wakhtiyo kala duwan ii soo jeedinayeen inaan ka qaybgalo
doorashooyinka golaha deegaanka, waxa taas xoojiyay anigoo ka mid ahaa
dadka aadka u daneeya inay wakhti badan iyo tacabba galiyaan danaha
caamka ah iyo horumarinta arrimaha bulshada, si gaar ahna aan in badan
maanka ku hayay inaan gaar ahaan ka hawlgalo wax u qabashada
bulshooyinka xeebaha iyo horumarinta khayraadka xeebaheenna, sidaa
awgeedna waxan iska sharraxay urur siyaasadeedka RAYS degmada
Berbera, Gobolka Saaxil oo aan filayo inuu yahay urur siyaasadeed
hormood ah”
Mudane Mahad Bile Cali wuxu illaa sannadkii 1983kii ganacsade ka ahaa
dalka gudihiisa iyo dibaddiisaba, waxanu muddooyinkii u dambeeyay ka
mid ahaa dadka u dhaqdhaqaaqa arrimaha bulshooyinka gubanka iyo dhulka
xeebta ah sida deegaannada Bullaxaar oo ka mid ah boqcadaha qadiimiga
ah ee taariikhda faca weyn ku leh Somaliland. Mudane Mahad Bile Cali
wuxu ballanqaaday inaanu inta awooddisa iyo aqoontiisa ku siman waxba
ka hagran doonin bulshada deegaannada uu matalo ee degmada Berbera,
Gobolka Saaxil, waxanu sheegay inuu ka shaqayn doono sidii wax loogu
qaban lahaa bulshooyinka dhaqaalaha daran dhaqaale kobcin iyo shaqo
abuur loogu samayn lahaa dadweynahaas u badan reer guuraaga iyo qorrax
joogga gubanka deggan.
Mudane Mahad Bile waxa kale oo uu saxaafadda uga waramay inuu
taageeraal cadad badan oo uu kalsoonyahay ku haysto degmada Berbera
dhexdeeda, dhammaan deegaannada galbeedka Berbera ee Degmada Bullaxaar
illaa halka ay Lughaya ka gaadho, sidoo kalena taageerayaal badan iyo
meelo kale.
 
Report
Xasan Faarax Qamaan
Tel: 4115450