Waxa wax lala yaabo ah in Madaxweynahu uu kolba cidda uu doono u sameeyo hayad madax banana oon baahi iyo dhaqaale toona loo hayn. Waxa cad in dalkii noqday

dukaan qof leeyahay oon nidaam iyo hab dawladnimo ka maqantay. Maxaa keenay in TVgu madaxbanaanaado? Maxaa idaacadda loo madax banaanayn waayey? Halkay kaga jirta arrintani miisaaniyaddii xukuumadda ee Golaha Wakiiladu ansixiyeen. Xukuumaddu waa inay ku shaqaysaa Miisaaniyaddii la ansixiyey, hadday wax ka bedeleysana waa inay oggolaasho ka heshaa Golaha Wakiilada. Sidoo kale ayey tahay inay oggolaasho ka hesho Wakiilada intayna Hayad cusub abuurin amba ayna Wasaarad ka jarin hayad madaxbanaan.

Sidaas ayuu dastuurku qabaa ee yaa tusaaya Wakiiladeena danta gaar ah mooyee ka hurda danta caamka ah.

Waxa aynu ognahay in musuqmaasuq xoogani ka taagnaa Wasaaradda Warfaafinta waliba si gaar ah TVga. Haddaba ma waxa xalku noqday in la madxbaneeyo si hantida qaranka ee jaranjarada wasaaradda lagu ilaalin kari waayey loo daayo nin keliya oo sida uu doono ugu tagrifala. Waxa in badan soo noqonaysay in meesha ay ku jirto sheeko qoys iyo rag xaafadda Madaxweynaha ka tirsan oo raba inay si toos ah u maalaan dhaqaalaha TVga kuna shaqaystaan taxiihii mashruuca ka dhigtay TVga London oon aqoon iyo khibrad TV lahayn walibana aan waligii cid madax u noqon.

Waa ayaan darro in boqolaalka rag iyo dumarba leh ee saxaafadda baratay khibraddana u le in laga boodo oo London laga soo waarido wiil u qabaana qoyska adduun jecelku madax maray inana aynu ka sugayno maamul wanaag. Waxa arrinkan looga baahan yahay in Wakiiladu bal mar uun ay fuliyaan wax dalka u dan ah ooy diidaan abuurista madaxbanaanida aan loo baahanayn bal se lagu cunaayo lacta qaranka.

Waxaad xusuusataa madaxbanaanida Dekedda Berbera iyo soo noqoshada Cali Xoorxoor. Tani taas ayey la mid tahay oo waliba wey ka liidataa oo wiilkan cumaamada beenta ah loo xidhay waa sawir cad quudheed loo tuuraayo kolka amarka iyo dheeftaba uu leeyahay wiilaka Siilanyo sodog u yahay ee Baashe waa ninka xiiran ee loo yaqaan Morgan.

Waxa hubaal ah inaan cilaaqad ka dhexeyn Siilanyo iyo wiilka TVga. Waxa se cad in dalka cid kale maamusho. Waxa habboon in Golaha Wakiiladu dalbaan baadhis caafimaad oo Madaxweynaha Alle ha shaafiyee la eego caafimadkiisa. Waan aqaan oon garan kara dareenka Madaxweynaha oon u dhalan nin jelicsan iyo nin tuugo soo dhoweysta. Waxa se muuqata inaanu lahaynawood caafimaad oo uu talada ku gaadho aragtidiisa. Waana waxa aanu marna diyaar ugu ahyn inuu hor yimaado shir jaraaid. Weynu garan karnaa Siilaanmyo oo caafimaad qabaa sida uu ugu raaxaysan lahaa rrintan.

Haddaba waar dalka aynu u gurmano oo weliba an Madaxweynaha u naxno oo waxa helay ma naxayaal aan caafimaadkiisa ilaalinayn bal se ka fa, ideysanaaya xanuun kiisa.

Golaha Wakiilada waxa saran xil weyn ee bal mar uun Alle ha tuso awoodooda ay dalkan ku badbaadin karaan. Madaxweynah waxaan ugu ducaynayaa caafimaad sareecan ah oo uu ku garto dabinka ay inta ugu dhowi u daadisay. Illaahow Madaxweynah xaqqa tus oo tus kuwa sida goofanaha ugu dhegan meel kasta oo dhaqaalaha dalka laga helaayo. Allow Soomaliland badbaadi oo ka badbaadi tuugta iyo maafiyada is kaashaday ee toos ula wareegay Madaxtooyadii qaranka.

Cali Jaamac

xeedho@ymail.com

FIIRO GAARA ANAGA KAMA MASUUL NIHIN ARAGTIDA SHACABKA